21Sep-2026
«Darwish» kitabı prezentatsıyası
2026-jıl 8-avgust kúni Qońırat rayonı Málimleme-kitapxana orayı tárepinen Qaraqalpaq ádebiyatınıń haqıyqıy pidayısı, belgili jazıwshı, shayır hám dramaturg Keńesbay Kárimovtıń ómiri hám kóp qırlı dóretiwshilik jumısına baǵıshlanǵan joqarı dárejedegi ádebiy-kórkem keshe hám kitap prezentaciyası shólkemlestirildi. Adebiyat – millettiń aynası, onıń júrek soǵıwı hám ruwxıy ǵáziynesi esaplanadı. Mine, usı ǵáziyneni óziniń kóp qırlı dóretiwshiligi, biytákirar shıǵarmaları hám ótkir qálemi menen bayıtqan jazıwshı – Keńesbay Kárimovtıń shıǵarmalarında qaraqalpaq eliniń dárti, quwanıshı, tariyxı hám búgingi turmısı sáwlelenedi.
Avtordıń qálemine tiyisli qosıqları, hám tariyxıy romanlar oqıwshını tek ǵana ótmish betlerine alıp barıp qoymastan, al adamgershilik, sadıqlıq hám watansúyiwshilik sezimlerin qáliplestiredi. Búgingi ádebiy-kórkem keshemiz mine usı ullı qálb iesiniń ómiri hám dóretiwshilik jolına baǵıshlandı. Ilajǵa ádebiyat ıqlasbentleri, qádirli ustazlar hám kitapqumarlarımız qatnasdı. Ádebiy kesheni ashıp beriw hám miymanlardı qutlıqlaw ushın sóz náwbeti Qońırat rayonı Málimleme kitapxana orayı direktorı D.Avezbayevaǵa berildi. Direktorımız óz sózinde Keńesbay Kárimov dóretiwshiliginiń qaraqalpaq ádebiyatı hám mádeniyatında tutqan ornı sheksiz ekenligin, onıń shıǵarmaları jaslar tárbiyasında áhmietli ruwxıy tiykar bolıp xızmet etetuǵının ayrıqsha atap ótip, ilajdı ashıq dep járiyaladı. «Direktorımızdıń atap ótkenindey: «Keńesbay Kárimovtıń shıǵarmaları tek ǵana oqıw ushın emes, ol qaraqalpaq eliniń ótmishi hám búginin baylanıstırıwshı ruwhıy kópir esaplanadı.»
Keńesbay Karimovtıń ómiri hám dóretiwshiligin Abonement hám paydalanıwshılarǵa xızmet kórsetiw xızmeti qániygesi Orimbaeva Gulchexra tanıstırıp ótdi. Keńesbay Kárimov tek ǵana gúrrińshi jazıwshı emes, ol insan qaraqalpaq eliniń dárti hám quwanıshın saxna shıǵarmalarında da joqarı sheberlik penen súwretlegen ullı dramaturg bolıp tabıladı. Jazıwshınıń qálemine tiyisli «Darwish» kitabina tayarlanǵan kishi bir saxnalıq kórinis shólkemlestirildi. K.Karimovtıń «Aǵabiy» kitabın eń kóp kitap oqıǵan kitapxanımız qaraqalpaq tili hám ádebiyati muǵalimi Saburova Amangul, «Darwish» kitabı prezentatsıyasın Abonement hám paydalanıwshılarǵa xızmet kórsetiw xizmeti qániygesi J.Toxtarova tanıstırıp ótdi.
