“Kitapqumar jaslar – jurt keleshegi”

“Kitapqumar jaslar – jurt keleshegi”

kitapqumarlıq_keshesi

Ózbekstan Respublikası Prezidentiniń 2026-jıl 5-yanvar kúngi 1-sanlı qararı atqarıwın támiyinlew maqsetinde máhállelerde sociallıq profilaktika hápteligin ótkeriw belgilep alınǵan. Dástúr sheńberinde respublikamız boylap rayonlarda hár qıylı ilajlar ótkerilmekte. Solar qatarında, búgin Qońırat rayonı Málimleme-kitapxana orayında jaslardı kitapqumarlıqqa shaqırıw, kitap oqıwǵa úgit-násiyatlaw maqsetinde“Kitapqumar jaslar – jurt keleshegi” atamasında  kitapqumarlıq ilajı shólkemlestirildi.

Ilajdı  Nuranıy qorı Qońırat rayonı bólimi baslıǵı Xalmurat Qurbanbayev ashıp berip, jaslarǵa búgingi kúnde jaratılıp berilip atırǵan imkaniyatlar hám de kitap oqıwdıń áhmiyetin, jámiyetimizde tutqan ornın ayrıqsha atap ótti. Soń Qońırat rayonı Ishki isler bólimi baslıǵı orınbasarı Orınbay Muxanov hám de Respublika Ruwxıy aǵartıwshılıq orayı Qońırat rayonı bólimi baslıǵı Úmitay Tilewmuratovalar sózge shıǵıp, jaslardı bunday ilajlarda ele de belsendi bolıwǵa shaqırıp, kitap oqıw insan dúnyaqarasın bayıtıwı, mánawiy jetik insan bolıp jetilisiwinde tutqan ornın aytıp ótti.

Sonday-aq, oqıwshılar tárepinen óz oqıǵan kitapları boyınsha tayarlanǵan prezentaciyalar, pikir-usınıslar hám kórkem shıǵıwlar kórsetildi. Poeziya menen shuǵıllanatuǵın oqıwshılar da ózleriniń dóretiwshilik úlgilerin usındı. Ilaj sońında viktorina oyınları hámde dáspe-dás bellesiwleri shólkemlestirilip, qızǵın dawam etti.

Ilaj juwmaǵında kitap oqıwdıń jaslar sanası hám ruwxıy jetikligindegi ornı jáne bir márte atap ótildi.