“Kitap shayır kewlinin’ jang’ırıg’ı”

“Kitap shayır kewlinin’ jang’ırıg’ı”

#Kitap_shayır_kewlinin_jangırıgı
“Ustyurt sadolari” festivalı sheńberinde Qońırat rayonı Málimleme kitapxana orayında Júrek derbewinen shıqqan hár qıylı kewil keshirmelerinen dórelgen qosıqlar avtorı, Ózbekstan Jazıwshılar Awqamı aģzası shayır hám jurnalist Jańabergen Tańirbergenov hám bir neshe medal hám kókirek belgisi iyesi, Qazaqstan Respublikasınıń “Qos qanat” Jazıwshılar awqamınıń aģzası, Qırģızstandaģı “Pelos” atlı jurnalģa, “Jáhán qálemkeshleri ” jurnalına dóretiwshilik jumısların kirgizgen shayıramız Barno Smetullayevalardıń jarqın ómiri hám dóretiwshiligine baģıshlanģan ádebiyat hám qosıqshılıqta júreklerimizge jıllı tásirler qaldıratuģın ushırasıw keshesi shólkemlestirildi. Ilajdı Respublika Ruwxıy aģartıwshılıq orayı Qońırat rayonı bólimi baslıģı U.Tilewmuratova hám Nuranıy qorı baslıģı X.Qurbanbaev kiris sóz benen ashıp berdi.
Ilajda shayır hám shayıranıń ómiri hám dóretiwshiligi boyınsha maǵlıwmatlar berilip, pazıyletleri atap ótildi. Ilajdıń ádebiy bóliminde Jańabergen Tańirbergenovtıń shıǵarmalarınan kitap prezentaciyası, Barno Smetullayevanıń qosıqlarınan kórkemlep oqılıp, ómiri hám dóretiwshiligine baģıshlanģan videorolikler kórsetildi. Bunnan soń Shayıramız Z.Yuldashova hám kitapxan anamız A.Saburova, Ózbekstan jurnalistler dóretiwshilik awqamı aģzası Aytbay Kamalov shıǵıp sóylep, shayırdıń ómir jolı, dóretiwshiligi kórkem dúnyaqarası haqqında jıllı pikirler bildirdi. Ushırasıw oǵada tolqınlandırıwshı hám ilhamlandırıwshı boldı.
Álbette, shayır kózi kórip, kókiregi sezip, bilgenin jazar eken, dóretpeleri arqalı xalıqtı aydın keleshekke ruwxlandırıwda, olardıń ruwxıy dúnyasın bayıtıwǵa qosqan úlesi sheksiz. Ushırasıw tek ǵana sóz ónerine ashıq kewillerdi oyatıp qoymastan, al jaslardıń ruwxıy dúnyasına jańa bir jaqtılıq alıp kirdi. Bunday ushırasıwlar dóretiwshilikke qushtar kewillerge suw shashadı, mánawiyatın bayıtadı hám ásirese, óz jolın endi baslap atırǵan jaslar ushın ustazlıq másláhátler mektebine aylanadı.
Qızıqlı ótken ádebiy saz-sáwbetli keshe Qońırat rayonı Mektepke shekemgi hám mektep bilimlendiriw bólimine qaraslı 18-sanlı hám 21-sanlı ulıwma orta bilim beriw mektebi oqıwshıları tárepinen tayarlanǵan yoshlı koncert baǵdarlaması menen dawam etti.
Ilaj sońında Qońırat rayonı Málimleme kitapxana orayı tárepinen “Húrmet jarlıq” ları hám estelik sawǵaları tapsırıldı.